ಎರಡೇ ವಾರದಲ್ಲಿ ಕೆಜಿಗೆ 100 ರೂ.ತೀವ್ರ ಏರಿಕೆ ಕಂಡ ಕೋಳಿ ಮಾಂಸ…ಕಾರಣವೇನು?

Views: 110

ಕನ್ನಡ ಕರಾವಳಿ ಸುದ್ದಿ : ರಾಜ್ಯದಲ್ಲಿ ಕಳೆದ ಕೆಲವು ದಿನಗಳಿಂದ ಕೋಳಿ ಮಾಂಸ ಬೆಲೆ ತೀವ್ರವಾಗಿ ಏರಿಕೆಯಾಗಲು ತಮಿಳುನಾಡಿನಲ್ಲಿ ಕೋಳಿ ಫಾರಂ ಮಾಲೀಕರು ಮುಷ್ಕರ ಹೂಡಿರುವುದೇ ಕಾರಣ. ತಮಿಳುನಾಡಿನ ಕೋಳಿ ಸಾಕಾಣಿಕೆದಾರರು ಖಾಸಗಿ ಕಂಪನಿಗಳು ನೀಡುತ್ತಿರುವ ಕಡಿಮೆ ಸಾಕಾಣಿಕೆ ದರದ ವಿರುದ್ಧ ಸಿಡಿದೆದ್ದಿದ್ದು ಜನವರಿ 1ರಿಂದ ಉತ್ಪಾದನೆಯನ್ನು ಸ್ಥಗಿತಗೊಳಿಸಿ ಮುಷ್ಕರ ನಡೆಸುತ್ತಿದ್ದಾರೆ.

ಬ್ರಾಟ್ಲರ್ ಕೋಳಿಗಳಿಗೆ ಪ್ರಸ್ತುತ ನೀಡುತ್ತಿರುವ 6.5 ರೂ. ದರವನ್ನು 20 ರೂ.ಗೆ ಹೆಚ್ಚಿಸಬೇಕು ಎಂಬುದು ಅವರ ಪ್ರಮುಖ ಬೇಡಿಕೆಯಾಗಿದೆ. ಈ ಮುಷ್ಕರದಿಂದಾಗಿ ತಮಿಳುನಾಡಿನ ಪ್ರಮುಖ ಉತ್ಪಾದನಾ ಕೇಂದ್ರಗಳಾದ ಪಲ್ಲಡಂ, ಈರೋಡ್‌ ಮತ್ತು ಕೊಯಮತ್ತೂರು ಭಾಗಗಳಿಂದ ಬೆಂಗಳೂರಿಗೆ ಬರುತ್ತಿದ್ದ ಕೋಳಿ ಮಾಂಸದ ಪೂರೈಕೆ ಸ್ಥಗಿತಗೊಂಡಿದೆ. ಪರಿಣಾಮವಾಗಿ ಮಾರುಕಟ್ಟೆಯಲ್ಲಿ ಚಿಕನ್ ಬೆಲೆ ಗಣನೀಯವಾಗಿ ಏರಿಕೆಯಾಗಿದೆ.

ಫಾರಂಗಳಲ್ಲಿ ಬಳಸುವ ತೆಂಗಿನ ನಾರಿನ ಬೆಲೆ ಪ್ರತಿ ಟ್ರ್ಯಾಕ್ಟರ್‌ ಲೋಡ್‌ಗೆ ಹಿಂದೆ 3,000 ರೂ. ಇದ್ದದ್ದು ಈಗ 22,000 ರೂ.ಗೆ ಏರಿಕೆಯಾಗಿದೆ. ಹೀಗಾಗಿ ಸಾಕಣೆದಾರರು ಬ್ರಾಯರ್ ಕೋಳಿಗೆ ಪ್ರತಿ ಕೆಜಿಗೆ 20 ರೂ., ನಾಟಿ ಕೋಳಿಗೆ 25 ರೂ. ಮತ್ತು ಕೌಜಗ ಹಕ್ಕಿಗೆ 7 ರೂ. ದರ ನೀಡಬೇಕೆಂದು ಒತ್ತಾಯಿಸುತ್ತಿದ್ದಾರೆ. ಫೀಡ್ ಕನ್ವರ್ಶನ್ ರೇಶಿಯೋ (ಎಫ್‌ಸಿಆರ್) ಪದ್ಧತಿಯನ್ನು ರದ್ದುಗೊಳಿಸಬೇಕು ಮತ್ತು ಕೋಳಿ ಸಾಕಣೆದಾರರಿಗೆ ಕಲ್ಯಾಣ ಮಂಡಳಿ ರಚಿಸಬೇಕು ಎಂಬುದು ಅವರ ಹಕ್ಕೊತ್ತಾಯವಾಗಿದೆ.

ತಮಿಳುನಾಡಿನ ಪಲ್ಲಡಂ ಮತ್ತು ನಾಮಕ್ಕಲ್ ಭಾಗಗಳಿಂದ ಬೆಂಗಳೂರು ಹಾಗೂ ಕರ್ನಾಟಕದ ಇತರ ಭಾಗಗಳಿಗೆ ದಿನನಿತ್ಯ ಭಾರಿ ಪ್ರಮಾಣದ ಕೋಳಿ ಮಾಂಸ ಪೂರೈಕೆಯಾಗುತ್ತದೆ. ಮುಷ್ಕರದ ಹಿನ್ನೆಲೆಯಲ್ಲಿ ಈ ಪೂರೈಕೆ ಸರಪಳಿ ಈಗ ತುಂಡಾಗಿದೆ. ಇದರ ಪರಿಣಾಮ ಡಿಸೆಂಬರ್‌ನಲ್ಲಿ ಕೆಜಿಗೆ 200-240 ರೂ. ಇದ್ದ ಕೋಳಿ ಮಾಂಸದ ಬೆಲೆ ಇದೀಗ 300 ರಿಂದ 320 ರೂ.ವರೆಗೆ ತಲುಪಿದೆ. ಮುಷ್ಕರ ನಿಲ್ಲದಿದ್ದರೆ ಈ ದರ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.

ಪರಿಸ್ಥಿತಿ ಕೈಮೀರುತ್ತಿರುವ ಹಿನ್ನೆಲೆಯಲ್ಲಿ ತಮಿಳುನಾಡು ಪಶುಸಂಗೋಪನಾ ಇಲಾಖೆ ಜನವರಿ 21ರಂದು ಸರ್ಕಾರ, ಬ್ರಾಯರ್ ಕಂಪನಿಗಳು ಮತ್ತು ಕೋಳಿ ಸಾಕಣೆದಾರರ ನಡುವೆ ತ್ರಿಪಕ್ಷೀಯ ಮಾತುಕತೆಗೆ ದಿನಾಂಕ ನಿಗದಿಪಡಿಸಿದೆ. ಈ ಸಭೆಯಲ್ಲಿ ತಮ್ಮ ಬೇಡಿಕೆಗಳು ಈಡೇರದಿದ್ದರೆ ಹೋರಾಟವನ್ನು ಮತ್ತಷ್ಟು ತೀವ್ರಗೊಳಿಸುವುದಾಗಿ ರೈತರು ಎಚ್ಚರಿಸಿದ್ದಾರೆ.

ವಿದ್ಯುತ್‌ ದರ ಮತ್ತಿತರ ವೆಚ್ಚ ಹಲವು ಪಟ್ಟು ಏರಿಕೆಯಾಗಿದ್ದರೂ ಕಳೆದ 5-6 ವರ್ಷಗಳಿಂದ ಕಂಪನಿಗಳು ನೀಡುವ ದರ ಹೆಚ್ಚಿಸಿಲ್ಲ ಎಂಬುದು ಸಾಕಣಿಕೆದಾರರ ಆಕ್ರೋಶ. ಸಮಸ್ಯೆ ಇತ್ಯರ್ಥಪಡಿಸಲು ಜನವರಿ 21ರಂದು ಕಂಪನಿಗಳು, ರೈತರು ಮತ್ತು ಸರ್ಕಾರದ ನಡುವೆ ತ್ರಿಪಕ್ಷೀಯ ಸಭೆ ನಡೆಯಲಿದೆ.

ತಮಿಳುನಾಡಿನ ಪಲ್ಲಡಂ, ತಿರುಪ್ಪರ್, ಈರೋಡ್ ಮತ್ತು ಕೊಯಮತ್ತೂರು ಭಾಗದ ಸಾವಿರಾರು ರೈತರು ಖಾಸಗಿ ಬ್ರಾಟ್ಲರ್ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಂಡು ಕೋಳಿ ಸಾಕಾಣಿಕೆ ಮಾಡುತ್ತಿದ್ದಾರೆ. ರೈತರ ಪ್ರಕಾರ ಕಳೆದ 5-6 ವರ್ಷಗಳಿಂದ ಕಂಪನಿಗಳು ರೈತರಿಗೆ ನೀಡುವ ಪ್ರತಿ ಕೆಜಿ ಕೋಳಿಯ ಸಾಕಾಣಿಕೆ ದರ ಕೇವಲ 6.5 ರೂ.ನಷ್ಟಿದೆ. ಆದರೆ, ಈ ಅವಧಿಯಲ್ಲಿ ವಿದ್ಯುತ್ ದರ, ಕಾರ್ಮಿಕರ ವೆಚ್ಚ ಮತ್ತು ನಿರ್ವಹಣಾ ವೆಚ್ಚಗಳು ದುಪ್ಪಟ್ಟಾಗಿವೆ.