ಮೊದಲ ಪ್ರೇಮ

Views: 232

ಮೊದಲ ನೋಟಕೆ ಸೋತೆ ಹೃದಯದೊಳು ನೀ ಕೂತೆ

ಮಧುರ ಸಂಗಮವಿದುವು ಹೌದಲ್ಲವೇ |ಪ

ಮದರಂಗಿ ಹೊಳೆದಾಗ ಮದುಮಗಳ ಕರದಲ್ಲಿ

ಉದಯಿಸುವ ಬಾಂಧವ್ಯ ಸೊಗಸಲ್ಲವೇ

ಅರುಹದೇ ಪರಿಚಯವ ವರಿಸುವಾತುರವೇಕೆ

ಹರಿಸಿದೊಡೆ ನವ ರಾಗ ನಾನೊಪ್ಪಲೇ |

ಬರುತಲಿದೆ ಯಾಕರಿಯೆ ತೆರೆಯಂತೆ ಮುನ್ನುಗ್ಗಿ

ತರಹ ಕಂಪನವೇಕೊ ನಾ ತಳ್ಳಲೇ ||

ನಾಚಿಕೆಯ ನೋಟದೊಳು ದೋಚಿರುವೆ ನನ್ನೊಲವ

ಗೀಚಿರುವ ಸಾಲುಗಳ ನಾ ಹಾಡಲೇ |

ಸೂಚನೆಯು ಸಿಕ್ಕೊಡನೆ ಯೋಚನೆಯು ನನಗಿಲ್ಲ

ಚಾಚಿರುವ ತೋಳಿನಲಿ ಹೂವನಿಡಲೇ

ಸುಮ್ಮನಿರು ಕೆಣಕದಿರು ಚಿಮ್ಮುತಿದೆ ಹೊಸ ಬಯಕೆ

ಸಮ್ಮತಿಯ ಕೊಟ್ಟಾಯ್ತು ನಾನಾಗಲೇ |

ನಮ್ಮೆದೆಯ ಭಾವಗಳ ಸಮ್ಮಿಲನದಾಟದಲಿ

ನೆಮ್ಮದಿಯು ಮೇಳೈಸೆ ಕುಣಿದಾಡಲೇ ||

ರಂಗೇರಿದಾ ಮೊಗದ ಕಂಗಳೊಳು ಸುಳಿದಿರುವ

ಹೊಂಗನಸ ಪದಪುಂಜ ನಾನರುಹಲೇ |

ಸಿಂಗರಿಸ ಬೇಕಿಲ್ಲ ಹೊಂಗಿರಣ ನೀನಿರಲು

ಮಂಗಳೆಗೆ ಸಿಂಧೂರ ನಾ ಹಚ್ಚಲೇ ||

ಬೇಡಿಕೆಯ ಇಟ್ಟೊಡನೆ ಹಾಡಲಾರೆನು ಇನಿಯ

ನೋಡಿಹರು ನಮ್ಮಪ್ಪ ನಾ ಕರೆಯಲೇ |

ಕೂಡಿ ಬಾಳಲು ಹೊರಟ ಜೋಡಿ ಹಕ್ಕಿಗಳೆರಡು

ಮೋಡಿ ಮಾಡುವ ಹೊತ್ತು ಬಂತಾಗಲೇ

-ಶೋಭಾ ಹರಿಪ್ರಸಾದ ಶೆಟ್ಟಿಗಾರ್ ಉಡುಪಿ