ಸಾಲಿಗ್ರಾಮ ವಿಶ್ವಕರ್ಮ ಹಾಲ್ ಸಮೀಪ ತೋಟದ ಬಾವಿಯಲ್ಲಿ ಕೊಳೆತ ಸ್ಥಿತಿಯಲ್ಲಿ ಪತ್ತೆ

Views: 51

ಕನ್ನಡ ಕರಾವಳಿ ಸುದ್ದಿ: ಇಲ್ಲಿನ ಸಾಲಿಗ್ರಾಮದ ವಿಶ್ವಕರ್ಮ ಹಾಲ್ ಸಮೀಪದ ತೋಟವೊಂದರ ಬಾವಿಯಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬರ ಶವ ಅತ್ಯಂತ ಭೀಕರವಾಗಿ ಕೊಳೆತ ಸ್ಥಿತಿಯಲ್ಲಿ ಶುಕ್ರವಾರ ಪತ್ತೆಯಾಗಿದೆ.

ಸುಮಾರು 30 ಅಡಿ ಆಳದ ಬಾವಿಯಿಂದ ದುರ್ನಾತ ಬೀರುತ್ತಿದ್ದ ಶವವನ್ನು ಮೇಲೆತ್ತುವಲ್ಲಿ ‘ಜೀವನ ಮಿತ್ರ’ ನಾಗರಾಜ್ ಪುತ್ರನ್ ಅವರು ತೋರಿದ ಅದಮ್ಯ ಸಾಹಸಕ್ಕೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.

ರಾಷ್ಟ್ರೀಯ ಹೆದ್ದಾರಿ 66ರ ಸರ್ವಿಸ್ ರಸ್ತೆ ಕಾಮಗಾರಿ ನಡೆಯುತ್ತಿದ್ದು, ಈ ಸಂದರ್ಭದಲ್ಲಿ ವಿದ್ಯುತ್ ಕಂಬಗಳ ಸ್ಥಳಾಂತರ ಕಾರ್ಯ ಪ್ರಗತಿಯಲ್ಲಿತ್ತು. ಕೆಲಸಗಾರರು ತೋಟದ ಸಮೀಪ ಕೆಲಸ ಮಾಡುತ್ತಿದ್ದಾಗ ಬಾವಿಯ ಕಡೆಯಿಂದ ಅಸಹನೀಯ ದುರ್ವಾಸನೆ ಬರುತ್ತಿರುವುದನ್ನು ಗಮನಿಸಿದರು. ಸಂಶಯಗೊಂಡು ಬಾವಿಯೊಳಗೆ ಇಣುಕಿ ನೋಡಿದಾಗ ಶವ ಕೊಳೆತು ಅರ್ಧ ಭಾಗ ಅಸ್ಥಿಪಂಜರ ಪತ್ತೆಯಾಗಿದೆ. ಕೂಡಲೇ ಈ ಬಗ್ಗೆ ಕೋಟ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದಾರೆ.

ಸ್ಥಳೀಯ ಉತ್ಪನ್ನ ನಾಗರಾಜ್ ಪುತ್ರನ್ ಅವರ ಶ್ಲಾಘನೀಯ ಕಾರ್ಯ: ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಮತ್ತು ಅಗ್ನಿಶಾಮಕ ದಳದವರು ಬಾವಿಯನ್ನು ಪರಿಶೀಲಿಸಿದರು. ಶವವು ಸುಮಾರು ಎರಡು ತಿಂಗಳಷ್ಟು ಹಳೆಯದಾಗಿದ್ದು, ಸಂಪೂರ್ಣವಾಗಿ ಕೊಳೆತು ಹೋಗಿದ್ದರಿಂದ ಬಾವಿಯಿಂದ ವಿಪರೀತ ದುರ್ವಾಸನೆ ಹೊರಬರುತ್ತಿತ್ತು. 30 ಅಡಿ ಆಳದ ಬಾವಿಗಿಳಿದು ಇಂತಹ ಸ್ಥಿತಿಯಲ್ಲಿರುವ ಶವವನ್ನು ಮೇಲೆತ್ತುವುದು ಅತ್ಯಂತ ಸವಾಲಿನ ಮತ್ತು ಅಪಾಯಕಾರಿ ಕೆಲಸವಾಗಿತ್ತು. ಯಾರೂ ಮುಂದಕ್ಕೆ ಬಾರದ ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ‘ಜೀವನ ಮಿತ್ರ’ ಕೋಟದ ನಾಗರಾಜ್ ಪುತ್ರನ್ ಅವರು ಆಪತ್ಬಾಂಧವರಾಗಿ ಧಾವಿಸಿದರು. ಯಾವುದೇ ಅಳುಕಿಲ್ಲದೆ, ಜೀವದ ಹಂಗು ತೊರೆದು ಆಳವಾದ ಬಾವಿಗಿಳಿದ ನಾಗರಾಜ್ ಅವರು, ಕೊಳೆತ ಶವವನ್ನು ಸುರಕ್ಷಿತವಾಗಿ ಮೇಲಕ್ಕೆ ತರುವಲ್ಲಿ ಯಶಸ್ವಿಯಾದರು. ಅಗ್ನಿ ಶಾಮಕ ದಳ ಸಿಬ್ಬಂದಿ ಹಾಗೂ ಪೊಲೀಸರು ಸಹಕರಿಸಿದರು.

ನಾಗರಾಜ್ ಅವರ ಈ ಸೇವಾ ಮನೋಭಾವ ಮತ್ತು ಧೈರ್ಯವನ್ನು ಕಂಡ ಸ್ಥಳೀಯರು ಹಾಗೂ ಪೊಲೀಸ್ ಇಲಾಖೆ ಮುಕ್ತಕಂಠದಿಂದ ಶ್ಲಾಘಿಸಿದೆ.

ಮೇಲ್ನೋಟಕ್ಕೆ ಇದು ಪುರುಷನ ಶವವೆಂದು ಗುರುತಿಸಲಾಗಿದ್ದು, ಮರಣೋತ್ತರ ಪರೀಕ್ಷೆಯ ನಂತರವಷ್ಟೇ ಹೆಚ್ಚಿನ ಮಾಹಿತಿ ಲಭ್ಯವಾಗಬೇಕಿದೆ. ಸದ್ಯ ಶವವನ್ನು ಮಣಿಪಾಲದ ಕೆಎಂಸಿ ಆಸ್ಪತ್ರೆಯ ಶವಾಗಾರಕ್ಕೆ ರವಾನಿಸಲಾಗಿದೆ. ಈ ಬಗ್ಗೆ ಕೋಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ವ್ಯಕ್ತಿಯ ಗುರುತು ಪತ್ತೆ ಹಚ್ಚುವ ಕಾರ್ಯ ಮುಂದುವರಿದಿದೆ