ಕರಾವಳಿಯಲ್ಲಿ ಮೇಘಸ್ಫೋಟ: ಕುಂದಾಪುರದ ಹಕ್ಲಾಡಿಯಲ್ಲಿ ರಾಜ್ಯದಲ್ಲೇ ಅತ್ಯಧಿಕ 189.ಮಿ.ಮೀ ಮಳೆ!
Views: 148
ಕನ್ನಡ ಕರಾವಳಿ ಸುದ್ದಿ: ಕಳೆದ 24 ಗಂಟೆಗಳಲ್ಲಿ ಕರಾವಳಿ ಕರ್ನಾಟಕದಾದ್ಯಂತ ಭಾರೀ ಮಳೆಯಾಗಿದ್ದು, ಉಡುಪಿ ಜಿಲ್ಲೆಯ ಕುಂದಾಪುರ ತಾಲ್ಲೂಕಿನ ಹಕ್ಲಾಡಿಯಲ್ಲಿ ಇದೇ ಮೊದಲ ಬಾರಿಗೆ ರಾಜ್ಯದ ಅತಿ ಹೆಚ್ಚು 189 ಮಿ.ಮೀ ಮಳೆಯಾಗಿದೆ. ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ಮೇಲ್ವಿಚಾರಣಾ ಕೇಂದ್ರ ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, ಅರಬ್ಬಿ ಸಮುದ್ರ ಮತ್ತು ಪಶ್ಚಿಮ ಘಟ್ಟಗಳ ಮೇಲಿನ ಸಕ್ರಿಯ ನೈಋತ್ಯ ಮಾನ್ಸೂನ್ ಪ್ರಭಾವದಿಂದ ಕರಾವಳಿ ಪ್ರದೇಶದಲ್ಲಿ ವ್ಯಾಪಕ ಮಳೆಯಾಗಿದೆ. ಉಡುಪಿ ಜಿಲ್ಲೆಯಲ್ಲಿ, ಹಕ್ಲಾಡಿಯಲ್ಲಿ 189 ಮಿ.ಮೀ. ಮಳೆಯಾಗಿದ್ದು, ನಂತರ ಕೊಲ್ಲೂರು (86.4 ಮಿ.ಮೀ.), ಸಿದ್ದಾಪುರ (50.2 ಮಿ.ಮೀ.), ಉಡುಪಿ ಪಟ್ಟಣ (30 ಮಿ.ಮೀ.) ಮತ್ತು ಕುಂದಾಪುರ ಪಟ್ಟಣ (14 ಮಿ.ಮೀ.) ದಾಖಲಾಗಿದೆ.
ಇದು ಹೊರತು ಪಡಿಸಿ ಉಡುಪಿ ಜಿಲ್ಲೆಯ ಹೆಬ್ರಿ, ಹೆಂಗವಳ್ಳಿ, ಅಂಪಾರುಗಳಲ್ಲಿ 170ಕ್ಕೂ ಅಧಿಕ, ಕುಂದಾಪುರದ ಚಿತ್ತೂರು, ಮಾಳ, ನಾಡ್ಪಾಲುಗಳಲ್ಲಿ 160ಕ್ಕೂ ಅಧಿಕ, ನಾಡಾ, ಮೊಳಹಳ್ಳಿ, ನೀರೆ, ಹಾರ್ದಳ್ಳಿ ಮಂಡಳ್ಳಿ, ಬಸ್ರೂರು, ಬೆಳ್ವೆಗಳಲ್ಲಿ 140ರಿಂದ 160ಮಿ.ಮೀನಷ್ಟು ಮಳೆಯಾದ ವರದಿ ಬಂದಿದೆ. ಈ ವರ್ಷ ಇದೇ ಪ್ರಥಮ ಬಾರಿಗೆ ಉಡುಪಿ ಜಿಲ್ಲೆಯ 30ಕ್ಕೂ ಅಧಿಕ ಗ್ರಾಮಗಳಲ್ಲಿ 100ಮೀ.ಮೀಗೂ ಅಧಿಕ ಮಳೆ ಸುರಿದು ದಾಖಲೆ ಬರೆದಿದೆ.
