ಮಹಿಳಾ ಪೇದೆ ಗಂಡಾಗಿ ಬದಲಾದ ಪೊಲೀಸ್ ಕಾನ್ಸ್ಟೇಬಲ್, ಈಗ ಗಂಡು ಮಗುವಿನ ತಂದೆ!
Views: 154
ಲಿಂಗ ಬದಲಾವಣೆ ಮಾಡಿಕೊಂಡು ಮಹಿಳಾ ಪೇದೆ ಗಂಡಾಗಿ ಬದಲಾಗಿದ್ದ ಮಹಾರಾಷ್ಟ್ರದ ಪೊಲೀಸ್ ಕಾನ್ಸ್ಟೇಬಲ್, ಗಂಡು ಮಗುವಿನ ತಂದೆಯಾಗಿದ್ದಾರೆ. ಲಿಂಗ ಬದಲಾವಣೆ ಮಾಡಿಕೊಂಡವರಿಗೆ ಮಕ್ಕಳನ್ನು ಪಡೆಯುವ ಸಾಮರ್ಥ್ಯ ಇರುವುದಿಲ್ಲ. ಆದರೆ ಲಲಿತ್ ಸಾಳ್ವೆ ತಂದೆಯಾಗಿರುವುದು ವಿಶೇಷ. ಇದಕ್ಕೆ ಕಾರಣ ಇಲ್ಲಿದೆ.
ಲಿಂಗ ಬದಲಾವಣೆ ಶಸ್ತ್ರಚಿಕಿತ್ಸೆಗೆ ಒಳಪಡುವ ಸಲುವಾಗಿ ಐದು ವರ್ಷಗಳ ಹಿಂದೆ ಬಾಂಬೆ ಹೈಕೋರ್ಟ್ನಲ್ಲಿ ಕಾನೂನು ಹೋರಾಟ ನಡೆಸಿ ಗೆಲುವು ಕಂಡಿದ್ದ ಮಹಾರಾಷ್ಟ್ರದ ಬೀಡ್ನ ಪೊಲೀಸ್ ಕಾನ್ಸ್ಟೇಬಲ್ ಲಲಿತ್ ಸಾಳ್ವೆ ತಂದೆಯಾದ ಖುಷಿಯಲ್ಲಿದ್ದಾರೆ.
2018ರಲ್ಲಿ ಕಾನೂನು ಹೋರಾಟದಲ್ಲಿ ಜಯಗಳಿಸಿದ ಬಳಿಕ ಲಲಿತ್ ಸಾಳ್ವೆ ಅವರು ಸರಣಿ ಸರ್ಜರಿಗಳಿಗಾಗಿ ಸಿಎಸ್ಟಿ ಸಮೀಪದ ಸರ್ಕಾರಿ ಸ್ವಾಮ್ಯದ ಸೇಂಟ್ ಜಾರ್ಜ್ ಆಸ್ಪತ್ರೆ ವೈದ್ಯರನ್ನು ಸಂಪರ್ಕಿಸಿದ್ದರು. ಅವರು ಪುರುಷನಾಗಿ ಬದಲಾಗಲು ಲಿಂಗ ಪರಿವರ್ತನೆಗೆ ಒಳಗಾಗಬೇಕಿತ್ತು. ಆದರೆ ಅವರು ಆನುವಂಶೀಯವಾಗಿ ಪುರುಷ ಎನ್ನುವುದು ತಿಳಿದು ಸಂಭ್ರಮಿಸಿದ್ದರು
ಸಾಳ್ವೆಗೆ ಗುಪ್ತಾಂಗ ಮರು ರಚನೆಯ ಸರ್ಜರಿ ಮಾತ್ರ ಅಗತ್ಯವಿತ್ತು. ಅವರಲ್ಲಿ ಬೆಳವಣಿಗೆಯಾದ ಶಿಶ್ನ ಹಾಗೂ ಸಮರ್ಪಕ ಸ್ಥಾನಕ್ಕೆ ಸೇರದ ವೃಷಣಗಳಿದ್ದವು. ಸರ್ಜರಿಗಳು ಮುಗಿದ ಬಳಿಕ , ಸಾಳ್ವೆ ಸಹಜವಾದ ಲೈಂಗಿಕ ಚಟುವಟಿಕೆ ನಡೆಸಬಹುದು ಮತ್ತು ಸಹಜವಾದ ವೀರ್ಯ ಬಿಡುಗಡೆ ಮಾಡಬಹುದು ಎನ್ನುವುದು ವೈದ್ಯಕೀಯ ತಂಡಕ್ಕೆ ಅರಿವಾಗಿತ್ತು. ಹೀಗಾಗಿ ಅವರಿಗೆ ಮಗುವಾಗಿರುವುದು ನಮಗೆ ಅಚ್ಚರಿ ಮೂಡಿಸಿಲ್ಲ ಎಂದು ಕಪೂರ್ ಹೇಳಿದ್ದಾರೆ. ಸಾಳ್ವೆ ಅವರಂತೆ ಲಿಂಗ ಬದಲಾವಣೆಗೆ ಒಳಗಾದವರಿಗೆಲ್ಲ ಮಕ್ಕಳು ಜನಿಸುವುದಿಲ್ಲ. ಅವರಲ್ಲಿ ಮಕ್ಕಳನ್ನು ಪಡೆಯುವ ಸಾಮರ್ಥ್ಯ ಇರುವುದಿಲ್ಲ
ಹುಟ್ಟಿದಾಗ ಹೆಣ್ಣು ಮಗು ಎಂದೇ ಭಾವಿಸಿದ್ದ ಸಾಳ್ವೆ ಕುಟುಂಬ, ಅವರನ್ನು ಹೆಣ್ಣಿನಂತೆಯೇ ಬೆಳೆಸಿತ್ತು. ಅವರ ಬಾಲ್ಯದಲ್ಲಿ ಒಂದು ವೃಷಣವನ್ನು ಕೂಡ ಸರ್ಜರಿ ಮೂಲಕ ತೆಗೆದು ಹಾಕಲಾಗಿತ್ತು. ಆದರೆ ಹುಡುಗಿಯಾಗಿ ಇರುವುದು ತಮಗೆ ಯಾವಾಗಲೂ ಕಿರಿಕಿರಿ ಉಂಟು ಮಾಡುತ್ತಿತ್ತು. 30 ವರ್ಷವಾದ ಬಳಿಕ ಲಿಂಗ ಬದಲಾವಣೆ ಆಪರೇಷನ್ಗೆ ಒಳಗಾಗಲು ನಿರ್ಧರಿಸಿದ್ದಾಗಿ ಹೇಳಿದ್ದಾರೆ.
2019ರಲ್ಲಿ ಮದುವೆಯಾಗಿದ್ದ ಲಲಿತ್ ಸಾಳ್ವೆ, ತಮ್ಮ 36ನೇ ವಯಸ್ಸಿನಲ್ಲಿ ತಂದೆಯಾಗಿದ್ದಾರೆ. “ಮಹಿಳೆಯಾಗಿ ನನ್ನ ಜೀವನ ಪ್ರಯಾಣವು ಸಂಕಷ್ಟಗಳಿಂದಲೇ ತುಂಬಿತ್ತು. ಈ ವೇಳೆ ನನಗೆ ಬೆಂಬಲವಾಗಿ ನಿಂತ ಅನೇಕರ ಆಶೀರ್ವಾದವೂ ಸಿಕ್ಕಿತ್ತು. ನನ್ನ ಹೆಂಡತಿ ಸೀಮಾ ಮಗು ಹೊಂದಲು ಬಯಸಿದ್ದಳು. ನಾನು ಈಗ ತಂದೆಯಾದೆ ಎಂಬುದು ಸಂತಸ ನೀಡುತ್ತಿದೆ” ಎಂದು ಹೇಳಿದ್ದಾರೆ.
2010ರಲ್ಲಿ ಮಹಾರಾಷ್ಟ್ರ ಪೊಲೀಸ್ ಇಲಾಖೆಯಲ್ಲಿ ಮಹಿಳಾ ಕಾನ್ಸ್ಟೇಬಲ್ ಆಗಿ ಸೇರಿಕೊಂಡಿದ್ದರು. 2013ರಲ್ಲಿ ಅವರಲ್ಲಿ ಟ್ರಾನ್ಸ್ ಸೆಕ್ಷುವಲ್ ಲಕ್ಷಣಗಳು ಕಂಡುಬರತೊಡಗಿದ್ದವು. ಅವರು ಕಾರ್ಯೋಟೈಪಿಂಗ್ ಎಂಬ ಲಿಂಗ ಪರೀಕ್ಷೆಗೆ ಒಳಗಾಗಿದ್ದರು. 2017ರಲ್ಲಿ ಅವರ ದೇಹದಲ್ಲಿ ಸಾಕಷ್ಟು ಬದಲಾವಣೆಗಳು ಕಂಡುಬರತೊಡಗಿದವು. ಅವರ ದೇಹದಲ್ಲಿ ‘ವೈ’ ಕ್ರೋಮೋಸೊಮ್ಗಳು ಇರುವುದು ಪರೀಕ್ಷೆಗಳಿಂದ ದೃಢಪಟ್ಟಿತ್ತು. ಇದರೊಂದಿಗೆ ಅವರು ಗಂಡಸು ಎನ್ನುವುದು ಖಚಿತವಾಗಿತ್ತು.
ತಮ್ಮ ಲಿಂಗ ಮರು ನಿಯೋಜನೆ ಸರ್ಜರಿಗಾಗಿ ಒಂದು ತಿಂಗಳು ರಜೆ ನೀಡುವಂತೆ ಕೋರಿ 2017ರ ನವೆಂಬರ್ನಲ್ಲಿ ಅವರು ಬಾಂಬೆ ಹೈಕೋರ್ಟ್ ಮೊರೆ ಹೋಗಿದ್ದರು. ಅವರಿಗೆ ಕೋರ್ಟ್ ಅನುಮತಿ ನೀಡಿತ್ತು. 2018- 2020ರ ನಡುವೆ ಅವರು ಮೂರು ಸರ್ಜರಿಗಳಿಗೆ ಒಳಗಾಗಿದ್ದರು.
ಮಹಿಳಾ ಪೇದೆಗೆ ಗಂಡಾಗಿ ಬದಲಾಗಲು ಒಪ್ಪಿಗೆ
ಇದರ ಬಳಿಕ ತಮ್ಮ ಹೆಸರನ್ನು ಲಲಿತ್ ಸಾಳ್ವೆ ಎಂದು ಬದಲಿಸಿಕೊಂಡಿದ್ದರು. ಎಲ್ಲಾ ಸರ್ಜರಿಗಳು ಮುಗಿದ ಬಳಿಕ 2019ರ ಫೆ. 16ರಂದು ಸೀಮಾ ಜತೆ ಲಲಿತ್ ಮದುವೆ ನಡೆದಿತ್ತು.
.
