ಚಿಕ್ಕ ವಯಸ್ಸಿನಲ್ಲೇ ಆರೋಗ್ಯವಂತರಲ್ಲೂ ಸೈಲೆಂಟ್ ಹಾರ್ಟ್ ಅಟ್ಯಾಕ್!? ಬಗ್ಗೆ ನಿಮಗೆಷ್ಟು ಗೊತ್ತು?

Views: 0

ಇತ್ತೀಚಿಗೆ ಯುವ ಜನತೆ ಹೆಚ್ಚಾಗಿ ಹೃದಯಾಘಾತದಂತಹ ಸಮಸ್ಯೆ ಎದುರಿಸುತ್ತಿದ್ದಾರೆ. ಚಿಕ್ಕ ವಯಸ್ಸಿನಲ್ಲೇ ಏಕಾಏಕಿ ಹೃದಯಾಘಾತಕ್ಕೆ ಒಳಗಾಗುತ್ತಿದ್ದಾರೆ. ಆರೋಗ್ಯವಂತರಲ್ಲೂ ಈ ರೀತಿಯ ಘಟನೆ ಸಂಭವಿಸಿ ಆತಂಕ ಹೆಚ್ಚುವಂತೆ ಮಾಡಿದೆ. ಆದರೆ ಈ ಸೈಲೆಂಟ್ ಹೃದಯಾಘಾತ ಹಾಗೂ ಅದರ ಕ್ಲಾಸಿಕ್ ರೋಗಲಕ್ಷಣಗಳ ಬಗ್ಗೆ ತಿಳಿದುಕೊಂಡಾಗ ಮಾತ್ರ ಅಚಾನಕ್ ಆಗಿ ಎದುರಾಗುವ ಆಘಾತದಿಂದ ಎಚ್ಚರಿಕೆ ವಹಿಸಬಹುದು.

ಯುವ ಸಮುದಾಯದಲ್ಲಿ ಕಾಣಸಿಗುವ ಈ ಸೈಲೆಂಟ್ ಹೃದಯಾಘಾತವು ಹೆಚ್ಚಿನ ಲಕ್ಷಣ ಬಿಟ್ಟುಕೊಡದೆ ಅವರಿಗೆ ಏನಾಗುತ್ತಿದೆ ಎಂದು ತಿಳಿದುಕೊಳ್ಳುವ ಮೊದಲೇ ಸಾವಿನ ಅಂಚಿಗೆ ತಂದು ನಿಲ್ಲಿಸುತ್ತಿದೆ. ಹೃದಯಾಘಾತದ ಲಕ್ಷಣಗಳಾದ ಎದೆನೋವು, ಅತೀಯಾದ ಬೆವರುವಿಕೆ, ಕುಸಿದು ಬೀಳುವುದು ಇಂತಹ ಯಾವುದೇ ಲಕ್ಷಣಗಳು ಇಲ್ಲದೆ ಏಕಾಏಕಿ ಸಾವು ಸಂಭವಿಸಬಹುದು. ಹೃದಯಾಘಾತಗಳು ಸಾಮಾನ್ಯವಾಗಿ ವಯಸ್ಸಾದ ವ್ಯಕ್ತಿಗಳೊಂದಿಗೆ ಸಂಬಂಧ ಹೊಂದಿದ್ದರೂ, ಅವು ಯಾವುದೇ ವಯಸ್ಸಿನ ಅಥವಾ ಲಿಂಗದ ಯಾರ ಮೇಲೂ ಪರಿಣಾಮ ಬೀರಬಹುದು. ಬಹಳಷ್ಟು ಮಂದಿ ಹೃದಯಾಘಾತದ ಲಕ್ಷಣ ಇಲ್ಲದೆಯೂ ಉಸಿರಾಟದ ಸಮಸ್ಯೆ ಇಲ್ಲದಿದ್ದರೂ, ಏಕಾಏಕಿ ಹೃದಯಸ್ತಂಭನವಾಗುವುದನ್ನು ನಾವು ನೋಡಿದ್ದೇವೆ.

ಸೈಲೆಂಟ್ ಹೃದಯಾಘಾತದ ಲಕ್ಷಣಗಳೇನು?

ಸೈಲೆಂಟ್ ಹೃದಯಾಘಾತಕ್ಕೂ ಮುನ್ನ ಏನೆಲ್ಲಾ ಸಂಭವಿಸಲಿದೆ ಎಂಬುದನ್ನು ನೋಡಿ. ಅತೀಯಾದ ಆಯಾಸ ಯಾವುದೇ ಅಡೆತಡೆಯಿಲ್ಲದೆ ಕೆಲಸ , ಕಾರ್ಯದಲ್ಲಿ ತೊಡಗುತ್ತಿದ್ದವರು ನಿರಂತರ ಮತ್ತು ವಿವರಿಸಲಾಗದ ಆಯಾಸಕ್ಕೆ ಒಳಗಾಗುವುದು. ಏಕಾಏಕಿ ಆಯಾಸವಾದ ಅನುಭವವಾದರೆ ಅದು ಸೈಲೆಂಟ್ ಹೃದಯಾಘಾತದ ಲಕ್ಷಣವೂ ಆಗಿರಬಹುದು. ಆದರೆ ಎಲ್ಲ ಸಮಯದಲ್ಲೂ ಆಯಾಸವಾದಾಗ ಅದು ಹೃದಯಾಘಾತದ ಲಕ್ಷಣವಾಗಿರುವುದಿಲ್ಲ. ಸುಮ್ಮನೇ ಕುಳಿತಾಗಲೂ ಆಯಾಸವಾದರೆ ಎಚ್ಚರಿಕೆ ಅಗತ್ಯ. ಉಸಿರಾಟದ ತೊಂದರೆ ದೈಹಿಕವಾಗಿ ಯಾವುದೇ ಚಟುವಟಿಕೆಯಲ್ಲಿ ಭಾಗಯಾಗದಿದ್ದರೂ ಹಠಾತ್ ಉಸಿರಾಟದ ತೊಂದರೆಯನ್ನು ಅನುಭವಿಸುವ ವ್ಯಕ್ತಿಗಳು ಸೈಲೆಂಟ್ ಹೃದಯಾಘಾತದ ಸಾಧ್ಯತೆಯ ಬಗ್ಗೆ ಎಚ್ಚರದಿಂದಿರಬೇಕು. ಹೃದಯಕ್ಕೆ ಅಗತ್ಯವಾದ ಆಮ್ಲಜನಕ ಪೂರೈಕೆಯಲ್ಲಿ ವ್ಯತ್ಯಯವಾದಾಗ ಉಸಿರಾಟದ ಸಮಸ್ಯೆ ಎದುರಾಗುತ್ತದೆ. ಇದು ಸಹ ಸೈಲೆಂಟ್ ಹೃದಯಾಘಾತಕ್ಕೆ ದಾರಿಯಾಗಿರಬಹುದು. ದೇಹದ ಮೇಲ್ಭಾಗದಲ್ಲಿ ಅಸ್ವಸ್ಥತೆ ತೋಳುಗಳು, ಕುತ್ತಿಗೆ, ದವಡೆ ಅಥವಾ ಬೆನ್ನು ಸೇರಿದಂತೆ ದೇಹದ ಮೇಲ್ಭಾಗದಲ್ಲಿ ಅಸ್ವಸ್ಥತೆಯು ಸೈಲೆಂಟ್ ಹೃದಯಾಘಾತದ ಲಕ್ಷಣವನ್ನು ಸೂಚಿಸುತ್ತದೆ. ಆದರೆ ಸೈಲೆಂಟ್ ಹೃದಯಾಘಾತದಲ್ಲಿ ಎದೆನೋವು ಕಾಣಿಸಿಕೊಳ್ಳಲೇ ಬೇಕು ಎಂಬ ನಿಯಮವೇನಿಲ್ಲ. ಆದರೆ ಹಲವು ಬಾರಿ ಈ ರೀತಿ ಲಕ್ಷಣವನ್ನು ಗ್ಯಾಸ್ಟ್ರಿಕ್ ಅಂತಲೇ ನಿರ್ಲಕ್ಷ್ಯ ಮಾಡುವವರು ಹೆಚ್ಚು. ವಾಕರಿಕೆ ಮತ್ತು ತಲೆತಿರುಗುವಿಕೆ ನಿರಂತರ ವಾಕರಿಕೆ, ಕೆಲವೊಮ್ಮೆ ತಲೆತಿರುಗುವಿಕೆ ಲಘು ಹೃದಯಾಘಾತದ ಜೊತೆ ಸೈಲೆಂಟ್ ಹೃದಯಾಘಾತದ ಸಂಕೇತವಾಗಿರಬಹುದು.

ರಕ್ತವನ್ನು ಪರಿಣಾಮಕಾರಿಯಾಗಿ ಪಂಪ್ ಮಾಡಲು ಹೃದಯದ ಅಸಮರ್ಥತೆಯು ರಕ್ತದೊತ್ತಡದ ಕುಸಿತಕ್ಕೆ ಕಾರಣವಾಗಬಹುದು, ಇದರ ಪರಿಣಾಮವಾಗಿ ಈ ಲಕ್ಷಣ ಕಂಡುಬರುತ್ತದೆ. ಅತೀಯಾಗಿ ಬೆವರುವುದು ನೀವು ಬಿಸಿಲು ಅಥವಾ ದೈಹಿಕ ಕಾರ್ಯಗಳಲ್ಲಿ ತೊಡಗದಿದ್ದರೂ ವಿಪರೀತವಾಗಿ ಬೆವರುತ್ತಿದ್ದರೆ ನಿರ್ಲಕ್ಷಿಸಬೇಡಿ. ಇದು ಸಹ ಸೈಲೆಂಟ್ ಹೃದಯಾಘಾತದ ಲಕ್ಷಣವಾಗಿರಬಹುದು. ಸಾಮಾನ್ಯಕ್ಕಿಂತ ಹೆಚ್ಚು ಬೆವರುವುದು ಪರಿಸರ ಅಥವಾ ದೈಹಿಕ ಪರಿಶ್ರಮಕ್ಕೆ ಸಂಬಂಧಿಸಿಲ್ಲ, ಇದು ಆಧಾರವಾಗಿರುವ ಹೃದಯರಕ್ತನಾಳದ ಸಮಸ್ಯೆಯನ್ನು ಸೂಚಿಸುತ್ತದೆ. ಬೆವರುವುದು ಹೃದಯದ ಮೇಲಿನ ಒತ್ತಡಕ್ಕೆ ದೇಹದ ಪ್ರತಿಕ್ರಿಯೆಯಾಗಿರಬಹುದು.

ಸೈಲೆಂಟ್ ಹಾರ್ಟ್ ಅಟ್ಯಾಕ್ ತಡೆಯುವುದು ಹೇಗೆ?

ಹೃದಯ ಸಂಬಂಧಿ ಆರೋಗ್ಯದ ಬಗ್ಗೆ ಹೆಚ್ಚು ಗಮನ ಹರಿಸಿದರೆ ಈ ಸೈಲೆಂಟ್ ಹಾರ್ಟ್ ಅಟ್ಯಾಕ್‌ನಿಂದ ದೂರ ಉಳಿಯಬಹುದು. ಇದರ ಜೊತೆ ನಿಯಮಿತವಾಗಿ ವೈದ್ಯರ ಬಳಿ ಆರೋಗ್ಯ ತಪಾಸಣೆ ನಡೆಸುವುದು ಉತ್ತಮ. ಈ ವೇಳೆ ದೇಹದಲ್ಲಿ ಯಾವ ಪ್ರಮಾಣದಲ್ಲಿ ಸಕ್ಕರೆಯ ಪ್ರಮಾಣವಿದೆ. ಮಧುಮೇಹ ನಿಯಂತ್ರಣದಲ್ಲಿದೆಯೇ ಎಂಬೆಲ್ಲಾ ವಿಚಾರಗಳನ್ನು ಆಗಾಗ ಪರಿಶೀಲಿಸುವುದರಿಂದ ಹೃದಯಾಘಾತದಿಂದ ಪಾರಾಗಬಹುದು. ಇವರಲ್ಲದೆ ಕುಟುಂಬಸ್ಥರಲ್ಲಿ ಅಥವಾ ಹಿರಿಯರಲ್ಲಿ ಯಾರಿಗಾದರು ಹೃದಯ ಸಂಬಂಧಿ ಕಾಯಿಲೆ ಇದ್ದು, ಅವರ ಇತಿಹಾಸ ಅರಿಯುವುದು ಮುಖ್ಯ. ಏಕೆಂದರೆ ಸೈಲೆಂಟ್ ಹೃದಯಾಘಾತವು ಶೇ.35ರಷ್ಟು ಅಪಾಯವನ್ನು ಹೆಚ್ಚಿಸಲಿದೆ. ಹೀಗಾಗಿ ಆರೋಗ್ಯವಂತರೂ ಸಹ ಸೈಲೆಂಟ್ ಹೃದಯಾಘಾತಕ್ಕೆ ಒಳಗಾಗಬಹುದು. ಇದಕ್ಕೆ ವಿಶೇಷವಾಗಿ ಲಕ್ಷಣಗಳು ಗೋಚರವಾಗಬೇಕೆಂದಿಲ್ಲ.