ಫ್ಲ್ಯಾಟ್ನಲ್ಲಿ ಪ್ಲಾಸ್ಟಿಕ್ ಡ್ರಮ್ ನಲ್ಲಿ ಅಸ್ಥಿಪಂಜರ:ಭಯಾನಕ ಸನ್ನಿವೇಶ ಕಂಡು ಬೆಚ್ಚಿಬಿದ್ದ ಮಾಲೀಕ
Views: 0
ಕೋಲ್ಕತಾ: ಎರಡು ವರ್ಷಗಳಿಂದ ಬಾಗಿಲು ಮುಚ್ಚಿದ್ದ ಫ್ಲ್ಯಾಟ್ ಅನ್ನು ನವೀಕರಣಕ್ಕಾಗಿ ಬಾಗಿಲು ತೆಗೆಸಿದ್ದ ಅದರ ಮಾಲೀಕ ಒಳಗಿನ ಭಯಾನಕ ಸನ್ನಿವೇಶ ಕಂಡು ಬೆಚ್ಚಿಬಿದ್ದಿದ್ದಾನೆ. ಪಶ್ಚಿಮ ಬಂಗಾಳದ ಬಾಗುಯಾಟಿಯಲ್ಲಿನ 1 ಬಿಎಚ್ಕೆ ಫ್ಲ್ಯಾಟ್ನ ಸ್ವಚ್ಛತೆ ಹಾಗೂ ನವೀಕರಣ ಕೆಲಸಕ್ಕೆ ತಯಾರಿ ನಡೆದಿತ್ತು. ಬೀಗ ತೆಗೆದವರಿಗೆ ಸಿಮೆಂಟ್ನಿಂದ ಮುಚ್ಚಿದ್ದ ದೊಡ್ಡ ಪ್ಲಾಸ್ಟಿಕ್ ಡ್ರಮ್ ಒಳಗಿದ್ದ ಕಾಣಿಸಿದೆ.
ನಾಲ್ಕು ಅಂತಸ್ತಿನ ಕಟ್ಟಡದ ಮೇಲಿನ ಮಹಡಿಯಲ್ಲಿ ಈ ಫ್ಲ್ಯಾಟ್ ಇದ್ದು, ನೇಪಾಳದ ದಂಪತಿ 2018ರಲ್ಲಿ ಬಾಡಿಗೆಗೆ ಬಂದಿದ್ದರು. ಎರಡು ವರ್ಷದ ಹಿಂದೆ ಬಾಡಿಗೆದಾರರು ಫ್ಲ್ಯಾಟ್ಗೆ ಬೀಗ ಹಾಕಿ ತೆರಳಿದ್ದರು. ಆದರೆ ಬಾಡಿಗೆ ಹಣ ಪಾವತಿಸುವುದನ್ನು ಮುಂದುವರಿಸಿದ್ದರು.
ಕಳೆದ ಆರು ತಿಂಗಳಿನಿಂದ ಮನೆ ಮಾಲೀಕನಿಗೆ ಬಾಡಿಗೆ ಮೊತ್ತ ಪಾವತಿಯಾಗಿರಲಿಲ್ಲ. ಹೀಗಾಗಿ ಬಾಗಿಲು ಒಡೆದು, ಸ್ವಚ್ಛಗೊಳಿಸಲು ಮತ್ತು ಬೇರೆ ಬಾಡಿಗೆದಾರರಿಗೆ ಅದನ್ನು ನೀಡಲು ಮಾಲೀಕ ಮುಂದಾಗಿದ್ದ.
ಸುಮಾರು 30 ವರ್ಷದ ಆಸುಪಾಸಿನವರಾದ ದಂಪತಿ ಕೋವಿಡ್ ಸಮಯದಲ್ಲಿಯೂ ಫ್ಲ್ಯಾಟ್ನಲ್ಲಿ ವಾಸವಿದ್ದರು. 2021ರಲ್ಲಿ ಅವರು ನೇಪಾಳಕ್ಕೆ ತೆರಳಿದ್ದರು ಎಂದು ಮನೆ ಮಾಲೀಕ ಗೋಪಾಲ್ ಮುಖರ್ಜಿ ತಿಳಿಸಿದ್ದಾರೆ.
ಅಸ್ಥಿಪಂಜರದ ಕೈಯಲ್ಲಿ ಬಳೆ ಇದ್ದು, ರಾತ್ರಿ ಉಡುಗೆ ಧರಿಸಿದಂತೆ ಕಂಡುಬಂದಿದೆ. ಆದರೆ ಇದು ಪುರುಷನ ಶವವೇ ಅಥವಾ ಮಹಿಳೆಯದ್ದೇ ಎಂದು ಸ್ಪಷ್ಟಪಡಿಸುವುದು ಪೊಲೀಸರಿಗೆ ಸಾಧ್ಯವಾಗಿಲ್ಲ.
“ನಾವು ಅಸ್ಥಿಪಂಜರವನ್ನು ಮರಣೋತ್ತರ ಪರೀಕ್ಷೆಗೆಂದು ಕಳುಹಿಸಿದ್ದೇವೆ. ಅದು ಪುರುಷನದ್ದೇ ಅಥವಾ ಮಹಿಳೆಯ ದೇಹವೇ ಮತ್ತು ಸಾವಿನ ಸಮಯ ಹಾಗೂ ಕಾರಣ ಏನು ಎನ್ನುವುದು ವರದಿ ಬಂದ ನಂತರ ಗೊತ್ತಾಗಲಿದೆ” ಎಂದು ಬಿಧಾನನಗರ ಪೊಲೀಸ್ ಉಪ ಆಯುಕ್ತ ಬಿಸ್ವಜಿತ್ ಘೋಷ್ ತಿಳಿಸಿದ್ದಾರೆ.
ಈ ದಂಪತಿಯ ಯಾವುದೇ ಫೋಟೋ ಕಟ್ಟಡದ ಮಾಲೀಕ ಗೋಪಾಲ್ ಮುಖರ್ಜಿ ಬಳಿ ಇಲ್ಲ. ಅವರ ಹೆಸರು ಕೂಡ ನೆನಪಿಲ್ಲ. ತಮ್ಮ ಬಳಿ ಇದ್ದ ಬಾಡಿಗೆ ಒಪ್ಪಂದ ಇದೆ ಎಂದು ತಿಳಿಸಿದ್ದಾರೆ. ಆದರೆ ಅವರ ಬಳಿ ಇದ್ದ ದಂಪತಿಯ ಫೋನ್ ನಂಬರ್ ಸ್ವಿಚ್ ಆಫ್ ಆಗಿದೆ.
ಆರು ತಿಂಗಳಿನಿಂದ ಹಣ ಕಳುಹಿಸಿರಲಿಲ್ಲ
“ಕೆಲವು ತಿಂಗಳ ಮಟ್ಟಿಗೆ ಮನೆಗೆ ಹೋಗುತ್ತಿದ್ದು, ಶೀಘ್ರವೇ ವಾಪಸ್ ಬರುವುದಾಗಿ ತಿಳಿಸಿದ್ದರು. ಪ್ರತಿ ತಿಂಗಳೂ ತಪ್ಪದೇ ಬಾಡಿಗೆ ಹಣ ನೀಡುವುದಾಗಿಯೂ ಭರವಸೆ ನೀಡಿದ್ದರು. ಆರಂಭದಲ್ಲಿ ಸಮಯಕ್ಕೆ ಸರಿಯಾಗಿ ಬಾಡಿಗೆ ಪಾವತಿಸುತ್ತಿದ್ದರು. ಕಳೆದ ವರ್ಷದಿಂದ ತಡವಾಗಿ ನೀಡಲು ಆರಂಭಿಸಿದ್ದರು. ಆರು ತಿಂಗಳಿನಿಂದ ಹಣ ಕಳುಹಿಸಿರಲಿಲ್ಲ. ತಮಗೆ ಆರ್ಥಿಕ ಸಂಕಷ್ಟ ಎದುರಾಗಿದೆ ಎಂದು ಆ ವ್ಯಕ್ತಿ ಹೇಳಿದ್ದ. ಎರಡು ತಿಂಗಳ ಹಿಂದೆ ಫೋನ್ ಮಾಡಿದ್ದ ಮಹಿಳೆ ಕೂಡ ಹಣ ನೀಡುವುದಾಗಿ ಮಾತು ಕೊಟ್ಟಿದ್ದಳು” ಎಂದು ಮುಖರ್ಜಿ ತಿಳಿಸಿದ್ದಾರೆ.
ಇನ್ನು ಕಾಯುವುದು ಸರಿ ಎಲ್ಲ ಎಂದು ಮುಖರ್ಜಿ, ಫ್ಲ್ಯಾಟ್ ಅನ್ನು ಮತ್ತೆ ಬಾಡಿಗೆಗೆ ನೀಡಲು ನಿರ್ಧರಿಸಿದ್ದರು. ಇದಕ್ಕಾಗಿ ಸ್ವಚ್ಛತೆ ಹಾಗೂ ರಿಪೇರಿಗೆಂದು ಕೆಲಸಗಾರರನ್ನು ಕರೆಸಿದ್ದರು. ಶೌಚಾಲಯದಲ್ಲಿದ್ದ ನೀಲಿ ಬಣ್ಣದ ನೀರಿನ ಪ್ಲಾಸ್ಟಿಕ್ ಡ್ರಮ್ ತೆಗೆಯಲು ಪ್ರಯತ್ನಿಸಿದಾಗ, ಅದರ ಮೇಲಿನ ಭಾಗವನ್ನು ಸಿಮೆಂಟ್ನಿಂದ ಮುಚ್ಚಿರುವುದು ಕಾಣಿಸಿತ್ತು. ಅವರು ಅದನ್ನು ಒಡೆಯಲು ಮುಂದಾದಾಗ ಕೆಟ್ಟ ವಾಸನೆ ಮೂಗಿಗೆ ಬಡಿದಿತ್ತು. ಒಳಗೆ ಅಸ್ಥಿಪಂಜರ ಕಾಣಿಸಿದೆ.
ಮುಖರ್ಜಿ ಅವರಿಗೆ ಮಾಹಿತಿ ನೀಡಿದಾಗ ಅವರು ಪೊಲೀಸರನ್ನು ಸಂಪರ್ಕಿಸಿದರು. ಪೊಲೀಸರು ಡ್ರಮ್ ಅನ್ನು ಸಂಪೂರ್ಣವಾಗಿ ಒಡೆದು ಅಸ್ಥಿಪಂಜರ ಹೊರ ತೆಗೆದರು. ಫೋನ್ ಸಂಖ್ಯೆ, ಬ್ಯಾಂಕ್ ವಹಿವಾಟು ಹಾಗೂ ಬಾಡಿಗೆ ಒಪ್ಪಂದದ ಮೂಲಕ ನೇಪಾಳಿ ಜೋಡಿಯ ಪತ್ತೆಗೆ ತನಿಖೆ ಆರಂಭಿಸಲಾಗಿದೆ.
