ಯೋಗೀಂದ್ರ ಮರವಂತೆ ‘ನೀಲಿ ಫಲಕಗಳಲ್ಲಿ ನೆಲೆಯಾಗಿ ನಿಂದವರು’ ಸೆ. 21ಕ್ಕೆ ಲಂಡನ್ನಲ್ಲಿ ಬಿಡುಗಡೆ
Views: 27
ಕುಂದಾಪುರ: ಲೇಖಕ ಯೋಗೀಂದ್ರ ಮರವಂತೆ ಅವರ ಹೊಸ ಪುಸ್ತಕ ‘ನೀಲಿ ಫಲಕಗಳಲ್ಲಿ ನೆಲೆಯಾಗಿ ನಿಂದವರು’ ಸೆ. 21ರಂದು ಲಂಡನ್ನಲ್ಲಿ ಬಿಡುಗಡೆಯಾಗಲಿದೆ.
ಕಾರ್ಯನಿಮಿತ್ತ ಯು.ಕೆ ಪ್ರವಾಸದಲ್ಲಿರುವ ಕನ್ನಡದ ಖ್ಯಾತ ಲೇಖಕ, ವಿಮರ್ಶಕ ಎಸ್. ದಿವಾಕರ್ ಬಿಡುಗಡೆಗೊಳಿಸಲಿದ್ದಾರೆ. ಧಾರವಾಡದ ಮನೋಹರ ಗ್ರಂಥಮಾಲೆ ಇದನ್ನು ಪ್ರಕಟಿಸಿದೆ.
ಲಂಡನ್ನಲ್ಲಿ ಇತಿಹಾಸ ಪ್ರಸಿದ್ದರು ವಾಸಿಸಿದ್ದ ಕಟ್ಟಡಗಳ ಗೋಡೆಯ ಮೇಲೆ ಬ್ಲೂಫ್ಲೇಕ್ ಅಥವಾ ನೀಲಿಫಲಕ ಅಳವಡಿಸುವ ಪರಂಪರೆ ಇದೆ. ಇಂತಹ ವ್ಯಕ್ತಿಗಳಲ್ಲಿ ಜಾಗತಿಕವಾಗಿ ಪ್ರಸಿದ್ಧಿ ಪಡೆದ ಭಾರತೀಯರೂ ಸೇರಿದಂತೆ ಜಗತ್ತಿನ ವಿವಿಧ ದೇಶಗಳ ಹಲವರು ಸ್ಥಾನ ಪಡೆದಿದ್ದಾರೆ. ಇಂತಹ ಆಯ್ದ 28 ವ್ಯಕ್ತಿಗಳ ಕುರಿತಾದ ನಿರೂಪಣೆಯನ್ನು ತಮ್ಮ ಸೂಕ್ಷ ನಿರೀಕ್ಷಣಾ ಕೌಶಲ ಮತ್ತು ತಾವು ರೂಢಿಸಿಕೊಂಡ ವಿಶಿಷ್ಟ ಭಾಷಾಶೈಲಿಯ ಮೂಲಕ ಯೋಗೀಂದ್ರ ಈ ಪುಸ್ತಕದಲ್ಲಿ ಚಿತ್ರಿಸಿದ್ದಾರೆ. ಲಂಡನ್ ಸಮೀಪದ ಬ್ರಿಸ್ಟಲ್ ನಗರದ ಏರ್ಬಸ್ ವಿಮಾನ ನಿರ್ಮಾಣ ಸಂಸ್ಥೆಯಲ್ಲಿ ತಂತ್ರಜ್ಞ ಆಗಿರುವ ಯೋಗೀಂದ್ರ ಅವರ ‘ಲಂಡನ್ ಡೈರಿ’, ‘ಮುರಿದ ಸೈಕಲ್ ಹುಲಾಹೂಪ್ ಹುಡುಗಿ’, ‘ನನ್ನ ಕಿಟಕಿ’, ‘ಏರೋ ಪುರಾಣ’ ಪ್ರಬಂಧ ಸಂಕಲನಗಳು ಓದುಗರ ಮತ್ತು ವಿಮರ್ಶಕರ ಗಮನ ಸೆಳೆದಿವೆ.
ಪುಸ್ತಕ ಬಿಡುಗಡೆಯ ಸಂದರ್ಭಕ್ಕೆ ದಿವಾಕರ್ ಅವರ ಪತ್ನಿ ಲೇಖಕಿ, ಪ್ರ್ರಾಧ್ಯಾಪಿಕೆ ಜಯಶ್ರೀ ಕಾಸರವಳ್ಳಿ ಮತ್ತು ಯು.ಕೆಯ ಆಮಂತ್ರಿತ ಸ್ನೇಹಿತರು ಸಾಕ್ಷಿಯಾಗಲಿದ್ದಾರೆ ಎಂದು ಯೋಗೀಂದ್ರ ಅವರ ಸಹೋದರ ಜತೀಂದ್ರ ಮರವಂತೆ ಪ್ರಕಟಿಸಿದ್ದಾರೆ.
